У Мінску п'яны пасажыр мікрааўтобуса зламаў нос кіроўцу легкавіка за тое, што той пасігналіў

У Мінску будуць судзіць 47-гадовага мужчыну, які збіў кіроўцу. Пра гэта са спасылкай на пракуратуру піша агенцтва «Мінск-Навіны».

Паведамляецца, што абвінавачаны ехаў з жонкай па Старавіленскім тракце — мужчына нападпітку знаходзіўся на пасажырскім сядзенні. Непадалёк ад скрыжавання іх мікрааўтобус заглух, а кіроўца, які ехаў за імі, пачаў бесперапынна сігналіць. Тады фігурант выйшаў з салона і падышоў да яго. Паміж мужчынамі здарыўся слоўны канфлікт, падчас якога абвінавачаны ўдарыў 61-гадовага апанента па твары, зламаўшы яму нос.

Мужчыну затрымалі і распачалі ў дачыненні да яго крымінальную справу па ч.1 арт. 339 КК (Хуліганства). Максімальная санкцыя гэтай часткі артыкула — 3 гады пазбаўлення волі. У дачыненні да абвінавачанага абраная мера стрымання ў выглядзе асабістага паручальніцтва.