Эксперт па кібербяспецы распавёў, чаму беларусы не могуць запісацца ў консульства. Вось як МЗС Польшчы гэта пракаментаваў

Беларускі ўрач ужо некалькі месяцаў не можа запісацца на прыём у польскае консульства - усе даты зарэзерваваны. Але павялічыць шанцы можна, калі заплаціць пасярэднікам. Партал INNpoland.pl разбіраўся ў праблемах з візавай сістэмай разам з экспертам па кібербяспецы, які раней працаваў у паліцыі. Увагу на публікацыю звярнула «Радыё свабода».

- Пачалося з таго, што я напісаў заяву аб патрэбе ў працы іншаземца для свайго сябра з Гомеля. Я даслаў яму гэтую заяву. З таго часу я атрымліваю ад яго паведамленні: «Влодэк, паслухай, я не магу зарэгістравацца». Ён лекар, ён нічога не ведае пра інтэрнэт. Спачатку я не звярнуў на гэта ўвагі. Але потым гэта пачало паўтарацца другі, трэці і чацвёрты месяц запар, - расказаў Уладзімеж.

Запісацца на прыём у візавы цэнтр у Мінску, Гродне і Брэсце можна праз сайт фірмы VFS, і толькі ў сераду. Але ў гэты дзень сайт «не адказвае», піша выданне.

- Праблема ў тым, што старонка VFS не патрабуе падрабязнай інфармацыі. Акрамя таго, яна не правяраецца. Напрыклад, сёння нейкі спадар Іван Іваноў уводзіць фіктыўны нумар пашпарта - і дата рэзервуецца. Гэта ніхто не правярае, - кажа эксперт па кібербяспецы. - VFS з'яўляецца субпадрадчыкам консульстваў. Гэта індыйская кампанія, заснавальнікамі з'яўляюцца індусы, якія абслугоўваюць консульствы ў розных краінах. У іх вельмі дрэнная рэпутацыя. Яны падыходзяць да справы непрафесійна.

Па словах Уладзімежа, хутчэй за ўсё іх IT-спецыялісты спачатку блакуюць усе даты на сайце, а потым прадаюць прыкладна па 450 рублёў з чалавека. З дапамогай пэўных скрыптоў можна забраніраваць усе даступныя даты. І ў выніку запісацца на прыём без удзелу «пасрэднікаў» практычна немагчыма, адзначае INNpoland.pl.

МЗС Польшчы: «Мы не маем да гэтага ніякага дачынення»

Уладзімеж патэлефанаваў у консульства Польшчы ў Беларус і распавёў аб праблемах з рэгістрацыяй.

- Я не прабіраўся да консула, проста размаўляў з беларускай, якая добра размаўляла па-польску. Яна сцвярджала, што ўсё працуе як мае быць. «Не стварайце там праблем, усё працуе выдатна», - пачуў я ў трубцы. Таксама мужчыне сказалі, што консультва не мае ніякага дачынення да таго, што хтосьці прадае свае месцы.

Партал INNpoland.pl звярнуўся ў МЗС Польшчы з пытаннем, ці ведаюць там пра продаж забраніраваных месцаў для візіту. Як адзначае выданне, у міністэрстве пацвердзілі наяўнасць праблемы. Рост запатрабаванасці польскіх віз, які прывёў да з'яўлення пасярэднікаў, у ведамстве звязваюць з абмежаваннем колькасці віз, якія выдаюцца іншымі краінамі Шэнгена, прыпыненне авіязносін і палітыку беларускіх уладаў, якая штурхае людзей міграваць у Польшчу. На праблему ўплывае і скарачэнне штата польскага консульства. Пры гэтым у МЗС паабяцалі вырашыць праблему з пасярэднікамі.

«Гатуецца зусім новае ІТ-асяроддзе, якая выключае любы ўплыў пасярэднікаў на сістэму рэгістрацыі. Рашэнні, якія мы распрацоўваем, павінны быць рэалізаваны ў бліжэйшыя тыдні», - заявілі там у адказ INNPoland.