У Ляхавіцкім раёне на мясцовым доце з’явіўся надпіс «1941−1945» з георгіеўскай стужкай. Але высветлілася, што ўмацаванне да перыяду Вялікай Айчыннай вайны не адносіцца і, відаць, было ўзведзенае, калі гэтыя землі належалі міжваеннай Польшчы.
Упрыгожаны дот з ускладзеным вянком пад Ляхавічамі ў сакавіку паказваў тэлеканал «Брэст» з каментаром пра тое, што «яшчэ ў часы Першай сусветнай вайны ўздоўж транспартных артэрый узвялі бетонныя доты». А ў раённым выданні «Ляхавіцкі веснік» з’явіўся каментар пра тое, што надпіс на ўмацаванні не адпавядае рэчаіснасці, бо яно было пабудаванае ў міжваенны перыяд польскімі войскамі.
На каментар адказала начальніца аддзела ідэалагічнай работы і па справах моладзі Ляхавіцкага райвыканкама Вольга Бурак. Яна паведаміла, што напярэдадні Дня Перамогі праўладныя моладзевыя актывісты раёна расчысцілі доты ля дарогі Ляхавічы — Баранавічы і паблізу вёскі Набярэжная. «Нанесены раней нявысветленай асобай надпіс „1941−1945“ будзе выдалены ў сувязі з неадпаведнасцю гістарычнаму перыяду ўзвядзення дотаў», — адзначыла Бурак.