Экс-прэтэндэнт у кандыдаты ў прэзідэнты Беларусі на выбарах 2020 года Валерый Цапкала заявіў, што адправіў заяву ў Генпракуратуру: ён патрабуе завесці крымінальную справу на яе кіраўніка Андрэя Шведа. Пра гэта экс-кіраўнік ПВТ паведаміў у сваёй групе ў Telegram. Прычына гэтай заявы — прададзеная з аўкцыёну нерухомасць сям'і Цапкалаў.
«Ёсць важкія падставы меркаваць, што ў незаконным продажы кватэры па цане, значна ніжэйшай за рынкавую, асноўным выгадаатрымальнікам стаў грамадзянін Швед А.І.», — адзначае Валерый Цапкала.
Нагадаем, трохпакаёвую кватэру, якая належыць Валерыю Цапкалу, 9 красавіка з другой спробы прадалі на аўкцыёне. Яе купілі амаль за 396 тысяч рублёў.
Экс-кіраўнік Парку высокіх тэхналогій у сваёй заяве просіць правесці службовае расследаванне і прыцягнуць Андрэя Шведа да крымінальнай адказнасці.
«Калі ў выніку праведзенага расследавання высветліцца, што гэты грамадзянін не меў непасрэднай камерцыйнай зацікаўленасці, ён мусіць быць прыцягнуты да адказнасці на падставе арт. 217 КК РБ за незаконнае „бязвыплатнае адчужэнне ў значнай суме чужой маёмасці пры адсутнасці карыслівай мэты“», — адзначае Валерый Цапкала.
Раней жонка Валерыя Цапкалы Вераніка адзначала, што нерухомасць належыць не толькі яе мужу, але таксама ёй і іх няпоўнагадовым дзецям. На яе думку, рашэннем выставіць на таргі нерухомасць парушаецца ў тым ліку Канстытуцыя. Жанчына заклікала Следчы камітэт і пракуратуру правесці расследаванне з нагоды продажу нерухомасці.
Валерый Цапкала ў мінулым кіраваў беларускім Паркам высокіх тэхналогій. Для ўдзелу ў прэзідэнцкай кампаніі 2020 года ён сабраў ініцыятыўную групу, ездзіў па краіне. Аднак ЦВК адмовіў яму ў рэгістрацыі праз тое, што сабраных подпісаў пасля праверкі аказалася менш за сто тысяч. Калі палітыка не дапусцілі да ўдзелу ў выбарах, яго жонка Вераніка далучылася да аб’яднанага штабу Святланы Ціханоўскай.
Валерый Цапкала пакінуў краіну ў ліпені 2020 года, асцерагаючыся пераследу. 9 жніўня з Беларусі з’ехала і Вераніка. Сям’я Цапкалаў асталявалася ў Латвіі.
На радзіме Валерыя Цапкалу завочна асудзілі на 17 гадоў калоніі ўзмоцненага рэжыму. Нагадаем, у пачатку красавіка 2024 года стала вядома, што ў Мінску суд Партызанскага раёна прызнаў нікчэмнай угоду па адчужэнні жылога дома, гэтага дабівалася пракуратура. Прэтэнзіі ўзніклі да мінчука, які ў 2020 годзе перадаў жыллё лізінгавай кампаніі за 280 тысяч рублёў, але працягваў у ім жыць, аформіўшы дамову арэнды. Пракуратура палічыла, што сума ўгоды моцна заніжаная, а мужчына пазбавіўся ад жылля, каб яго не адабрала дзяржава. Пра каго канкрэтна ідзе гаворка, не паведамляецца. Аднак з паведамлення пракуратуры можна зрабіць выснову, што, хутчэй за ўсё, гісторыя пра дом сям'і Цапкалаў — Валерыя і Веранікі.
Чытайце таксама
