У Беларусі збіраюцца адрэгуляваць працу маркетплэйсаў — анлайн-пляцовак, на якіх розныя прадаўцы прапануюць свае тавары. Пра планы ўладаў увесці змяненні для такіх сэрвісаў паведаміў кіраўнік МАРГ Аляксей Багданаў на Пецярбургскім міжнародным эканамічным форуме (ПМЭФ), піша ТАСС. Да прыкладу, у Беларусі працуе маркетплэйс Emall, а таксама яго расійскія канкурэнты — Wildberries і OZON.
«У Беларусі прыняты новы закон пра гандаль, у якім уведзеныя новыя паняцці што да электроннага гандлю. У рамках гэтага закона мы сёння актыўна прапрацоўваем падзаконныя нарматыўна-прававыя акты, якія дазволяць адрэгуляваць у тым ліку працу маркетплэйсаў», — сказаў Аляксей Багданаў.
Паводле яго, у першую чаргу стаіць задача «забяспечыць абарону правоў спажыўцоў і ўвесці пэўныя цывілізаваныя правілы аказання паслуг». «Гэта дазволіць сённяшнія маркетплэйсы наблізіць да афлайн-гандлю», — сказаў міністр. Ён удакладніў, што гэта будзе датычыць пытанняў раскрыцця інфармацыі: чыноўнікі збіраюцца ўвесці абавязак для маркетплэйсаў паведамляць пра змену сваёй дзейнасці, размяшчаць неабходную інфармацыю пра тавар, весці зваротную сувязь па скаргах спажыўцоў. «Сёння ж маркетплэйсы аддалі гэта на водкуп пастаўшчыку і вытворцу. Вось табе месца, размяшчай і адказвай за ўсё», — удакладніў Аляксей Багданаў.
Нагадаем, на Emall, Wildberries ці OZON розныя прадаўцы прапануюць свае тавары. Беларускія чыноўнікі хочуць, каб гэтыя гандляры працавалі паводле пэўных правілаў, выконвалі прапісаныя для іх патрабаванні.
Раней у МАРГ расказвалі, што ўлады таксама хочуць даць агрэгатару (уладальніку маркетплэйса) права скасоўваць дамову з нядобрасумленнымі прадаўцамі, якія парушаюць заканадаўства пра абарону правоў спажыўцоў.
«А сам агрэгатар мусіць будзе забяспечваць дзейсную сувязь паміж прадаўцом і спажыўцом. Калі прадавец не будзе выконваць законныя патрабаванні, спажывец будзе мець права звярнуцца да маркетплэйса і атрымаць спрыянне, каб прымусіць прадаўца выканаць свае абавязанні. А калі, напрыклад, спажывец аплаціў праз маркетплэйс тавар, але прадавец яго не даставіў, то маркетплэйс будзе кампенсаваць спажыўцу грошы, а далей ужо з прадаўцом урэгулюе гэтае пытанне», — адзначалі раней у МАРГ.
Чытайце таксама
