Спыталі Мінфін Польшчы, як доўга будзе дзейнічаць забарона на вываз тавараў у Беларусь. Адказ вас не ўзрадуе

У панядзелак, 8 ліпеня, «Люстэрка» апублікавала афіцыйны каментар польскай мытні што да забароны на вываз тавараў у Беларусь. Аднак мытнікі суседняй краіны не ўдакладнілі, як доўга гэтае абмежаванне будзе дзейнічаць. У аўторак, 9 ліпеня, адказ на гэтае пытанне нам дало Міністэрства фінансаў Польшчы (яму падпарадкоўваецца Нацыянальная падатковая адміністрацыя Польшчы, у склад якой уваходзіць мытная служба).

— Рэгламент Рады Еўрапейскага саюза № 2024/1865 не мае канкрэтных часавых абмежаванняў дзеяння, — гаворыцца ў адказе Мінфіна. То-бок, па сутнасці, абмежаванні будуць дзейнічаць да таго моманту, пакуль Рада ЕС не прыме рашэнне іх скасаваць.

Таксама Міністэрства фінансаў Польшчы пацвердзіла, што згаданы вышэй рэгламент датычыць не толькі юрыдычных асоб, але і грамадзян, якія вязуць у Беларусь набытыя ў розніцу тавары.

— Забарона распаўсюджваецца на тавары і тэхналогіі, якія не могуць быць экспартаваныя на тэрыторыю Беларусі, незалежна ад таго, будзе гэты экспарт ажыццяўляцца фізічнымі або юрыдычнымі асобамі, — адзначаецца ў адказе польскага Мінфіна.

Нагадаем, з 4 ліпеня беларусы пачалі пісаць у чатах, што на выездзе з Польшчы ў Беларусь мытнікі не прапускаюць тых, хто вязе розныя тавары. У каментарах дапускалі, што гэта звязана з рашэннем Еўрасаюза ад 29 чэрвеня, якім ён распаўсюдзіў на Беларусь санкцыі, уведзеныя раней у дачыненні да Расіі.

Поўны спіс забароненых тавараў налічвае сотні найменняў і ўключае некаторыя морапрадукты (ракападобныя і ікру), хімічныя рэчывы, сродкі гігіены (пену для галення, мыла, дэзадаранты, парфумерыю і гэтак далей), будаўнічыя матэрыялы, туалетную паперу, жаночую вопратку і любую абутак з «падэшвай з гумы, пластмасы, скуры», каштоўныя камяні і гэтак далей. Таксама цяпер забаронена вывозіць розную тэхніку: рухавікі і маторы, помпы, лядоўні, пасудамыйныя машыны і іншае.

Чытайце таксама