У Беларусі 3 красавіка пачалі чарговую праверку баявой гатоўнасці арміі. Мы раней пісалі, што раздаць позвы загадзя ў ваенкаматах не паспелі і прыцягнулі для гэтага вайскоўцаў у запасе. Аказалася, што і ўдзельнікаў праверкі набіраюць у такім жа аўральным рэжыме. Пра гэта ў рэдакцыю напісаў чытач Мікалай, расказаўшы, што яго сын учора раніцай пайшоў на працу, а ўвечары апынуўся ў вайсковай частцы.
Імя суразмоўцы змененае з меркаванняў бяспекі. Звесткі ёсць у рэдакцыі.
Як расказвае суразмоўца, увечары 3 красавіка ў Брэсце пачалі масава ўручаць позвы ў ваенкамат. А калі не атрымлівалася аддаць асабіста, прыносілі на працу. Позву атрымаў у тым ліку сын Мікалая Аляксей. Чытач падкрэслівае: пра тое, што маладога чалавека павязуць у частку, яму ніхто не паведамляў. Выдаўшы позву, наадварот, запэўнілі, што трэба ўдакладніць звесткі і ўсё — гэта зойме толькі паўгадзіны.
— Учора, 4 красавіка, сын пайшоў на працу, а там яму ўручылі позву. І адразу сказалі з’явіцца да 9 раніцы ў цэнтр алімпійскага рэзерву па лёгкай атлетыцы. Пакуль сын быў на сувязі, то расказваў, што пры ім чалавек 400 пасадзілі ў аўтобусы і адправілі кудысьці ў кірунку Гродна. У людзей з сабой нічога няма, ні сродкаў, ні гігіены, у многіх праца, нейкія справы, — са словаў Аляксея апісвае сітуацыю Мікалай. — Сын паведаміў супрацоўнікам ваенкамата, што задзейнічаны ў вытворчасці і патрэбны на сваім прадпрыемстве, гэта нават пацвердзіў яго дырэктар. Толькі ніхто не стаў слухаць. Дзесьці ў тры гадзіны дня паспеў паведаміць, што вязуць у бок Пружанаў, — і тэлефоны сталі недаступныя. Дырэктар прадпрыемства ў шоку ад такога развіцця падзей, на вытворчасці без сына наогул ніяк. Але ніхто нават не паглядзеў на гэта. Усіх пад грабянец — і ў аўтобус. Нейкая дзікасць. Няўжо нельга па-чалавечы, даць сабрацца, вырашыць працоўныя моманты і да таго падобнае? У яго з сабой жа нічога няма, ён проста прыйшоў на працу.
Што з сынам і дзе ён, Мікалай не ведаў цэлы дзень. Толькі ўчора ўвечары, пасля сямі, малады чалавек выйшаў на сувязь і расказаў, што знаходзіцца ў вайсковай частцы.
— Ён патэлефанаваў літаральна на хвіліну — няма зарадкі, беражэ акумулятар, — кажа суразмоўца. — Ніхто ў частцы нічога не ведае: навошта, на колькі, што рабіць з імі і гэтак далей. Афіцэры самі ў такім жа шоку. Іх, падобна, гэтак жа раніцай перад фактам паставілі, яны нават не ведаюць, на колькі людзей разлічваць, а аўтобусы прыбываюць. Сын расказаў, што выдалі форму і далі ложак, а наогул адбываецца нейкі хаос, ніхто не ведае, што рабіць далей.
Што кажуць у ваенкамаце?
Чаму людзей забіраюць так раптоўна і не даюць сабрацца? Як жонка аднаго з прызваных на праверку боегатоўнасці журналістка «Люстэрка» патэлефанавала ў ваенкамат Брэста і Брэсцкага раёна.
— Учора мужа проста з працы выклікалі ў ваенкамат і потым павезлі ў частку, не далі ні рэчы сабраць, ні паведаміць нам нармальна. Як яму цяпер быць? — спытала яна.
— Ён будзе тэлефанаваць вам, і ўжо ў яго зможаце ўдакладніць, куды і што перадаць. Таму што ў нас ужо няма звестак. Мы толькі позвамі выклікаем, а адпраўка і іншае — ужо не нашая [задача]. У вайсковай частцы па-любому нейкі час вылучаюць, калі ён зможа патэлефанаваць. Ён патэлефануе, і вы ўдакладніце, па якім адрасе выслаць рэчы і гэтак далей, — адказалі ў ваенкамаце.
— А колькі ўсё гэта будзе доўжыцца?
— Ну, гэтага вам ніхто не скажа, такой інфармацыі няма ці яна закрытая проста.
— Чаму так тэрмінова забіралі наогул? З працы, ні рэчаў, ні зубной шчоткі банальна.
— Па ідэі, у позве ж пішуць на адваротным баку: мець з сабой прыналежнасці нейкія.
— Але яму сказалі, што гэта на паўгадзіны ўсяго, звесткі зверыць. А потым аказваецца, што вязуць кудысьці.
— Разумееце, гэта не да мяне такія пытанні, прэтэнзіі.
— Дык, а чаму так тэрмінова сабралі ўсіх? Муж казаў, што нават афіцэры не разумеюць, што з імі рабіць.
— Глядзіце тэлевізар, у нас усё як і ва ўсіх. Савет бяспекі праводзіць праверку боегатоўнасці. <…> Наконт працягласці інфармацыя закрытая, ніхто не можа сказаць. Можаце ўдакладняць гэта ўжо ў мужа. Да пабачэння.
Чытайце таксама
