У вядомага беларускага тэнісіста, экс-першай ракеткі свету ў парным разрадзе, дзесяціразовага ўладальніка тытулаў «Вялікага шлема», алімпійскага чэмпіёна Максіма Мірнага дыягнаставалі злаякасную пухліну, паведамляе Smartpress.by са спасылкай на інфармаваныя крыніцы.
Як стала вядома выданню, спартоўцу правялі трэпанацыю чэрапа і выдалілі пухліну ў адной з мінскіх бальніц.
«Аперацыя доўжылася 8 гадзін і прайшла вельмі паспяхова», — адзначыла крыніца.
Паведамляецца, што Максім Мірны звярнуўся да дактароў са скаргамі на галаўны боль крыху больш за месяц таму, праведзенае МРТ пацвердзіла несуцяшальны дыягназ.
У дзень аперацыі ў Беларусь, каб падтрымаць спартоўца, прыехалі яго жонка і чацвёра дзяцей.
Паводле суразмоўцаў выдання, Мірны добра перанёс аперацыю і разам з сям’ёй ужо з’ехаў з Беларусі для далейшага лячэння.
Нагадаем, тэнісіст жыве ў ЗША. Нядаўна ён прыехаў у Мінск правесці майстар-клас. Заадно спартовец зрабіў неадназначную заяву, у якой выказаў шкадаванне пра сваю ранейшую крытыку гвалту сілавікоў у дачыненні да беларусаў пасля выбараў 2020 года.