У Мінскім абласным судзе 15 снежня былому вайскоўцу Паўлу Кучынскаму прызначылі 19 гадоў калоніі ва ўмовах узмоцненага рэжыму. Працэс вёў суддзя Аляксандр Рыбакоў, паведамляе праваабарончы цэнтр «Вясна».
Паводле звестак праваабаронцаў, яго прызналі вінаватым па сямі крымінальных артыкулах, сярод якіх «Здрада дзяржаве», «Акт тэрарызму», «Стварэнне арганізацыі для ажыццяўлення тэрарыстычнай дзейнасці або ўдзел у ёй».
31-гадовага мінчука затрымалі прыкладна ў пачатку верасня 2022 года. Тады арганізацыя BYPOL напісала, што Кучынскі затрыманы ў сувязі з імавернай датычнасцю да «справы інкасатараў», а пасля сілавікі выкарыстоўвалі яго ў сваіх мэтах.
«Спецслужбы пад катаваннямі прымусілі [яго] удзельнічаць у правакацыі, у межах якой апошні выйшаў на сувязь з прадстаўнікамі BYPOL і прапаноўваў здзейсніць акцыі прамога дзеяння. Усе перамовы і перапіска фіксавалася», — сцвярджалі ў арганізацыі.
Нагадаем, у верасні 2022 года з’явілася інфармацыя, што ў мінскае аддзяленне «Белгазпрамбанка» прыйшлі сілавікі і жорстка затрымалі больш за дзясятак супрацоўнікаў інкасатарскай службы — імаверна, за абразу Лукашэнкі. Усіх іх абвінавацілі ў непадпарадкаванні міліцыі і далі па 14 сутак, некаторымі зацікавіўся Следчы камітэт.
Аднаго з былых інкасатараў банка, спецназаўца Яна Папковіча, у траўні 2023 года асудзілі на чатыры гады калоніі па арт. 342 КК (Удзел у групавых дзеяннях, якія груба парушаюць грамадскі парадак) і па ч. 1 арт. 13, ч. 1 арт. 361−3 КК (Падрыхтоўка да ўдзелу ва ўзброеным фарміраванні на тэрыторыі замежнай дзяржавы).