Раніцай 4 красавіка Мінздароўя паведаміла, што сямёра вучняў ліцэя БНТУ ў Мінску знаходзяцца ў дзіцячай інфекцыйнай бальніцы. Да таго ж значная частка падлеткаў лечыцца дома. Што менавіта стала прычынай масавай хваробы і шпіталізацыі, у ведамстве не ўдакладняюць. Даведаліся падрабязнасці.
«Бацькам сказалі, што проста прыйшлі ўсе пасля канікул, хтосьці прынёс вірус»
Як піша прэс-служба Мінздароўя, падлеткаў аглядаюць спецыялісты бальніцы і супрацоўнікі кафедраў дзіцячых інфекцыйных хвароб БДМУ. Стан пацыентаў стабільны. Частка падлеткаў, у якіх не такія сур’ёзныя скаргі, знаходзіцца на амбулаторным лячэнні дома. Акрамя таго, санэпідэміялагічная служба Мінска ўжо пачала расследаваць сітуацыю.
— Мая сяброўка, у якой дачка вучыцца ў тым ліцэі, кажа, што ў большасці дзяцей там проста ротавірус, — расказвае нашая крыніца. — Цяпер дачка сяброўкі дома, учора проста ванітавала, сёння парадак. У самім ліцэі бацькам сказалі, што «нічога страшнага, проста прыйшлі ўсе пасля канікул, хтосьці прынёс вірус, ён за тры дні спрацаваў».
Паводле суразмоўніцы, захварэлі не ўсе ліцэісты, таму заняткі сёння ідуць:
— Пачалося ўчора пасля абеду, і бацькі ўсю ноч у чаце перапісваліся. Дваіх дзяцей забралі ноччу на хуткай, дык у чаце пісалі, што прыехалі ў бальніцу, а там «ужо свае ляжаць».
Намесніца дырэктаркі ліцэя БНТУ: «Працуе санэпідслужба, ніякіх яшчэ высноваў яны не зрабілі»
Як усхваляваная мама навучэнца нашая журналістка патэлефанавала ў ліцэй БНТУ. Адказваючы на пытанне пра тое, што здарылася ва ўстанове адукацыі, намесніца дырэктаркі Наталля Грыневіч заклікала «не верыць чуткам».
— Па-першае, [захварэў] не ўвесь ліцэй, — расказала яна. — Па-другое, працуе санэпідслужба, і ніякіх яшчэ высноваў яны не зрабілі. Таму распаўсюджваць ілжывую інфармацыю я, напрыклад, не буду, пакуль няма афіцыйных звестак. <…> Пакуль няма ніякай інфармацыі. Што паслужыла прычынай, што дзеці трапілі ў бальніцу, ніхто не ведае. Таму я вам на гэтае пытанне не адкажу. Усё кантралюецца, усе санэпідслужбы горада, раёна, усе ў нас цяпер у ліцэі. Праводзяцца аналізы, даследаванні ўсіх супрацоўнікаў, бяруцца пробы. Таму ўсё пад кантролем, не хвалюйцеся.
Нягледзячы на сітуацыю і праверкі, ліцэй працягвае працаваць, кажа Наталля Грыневіч. Калі дакладна стане зразумела, у чым прычына, намесніца дырэктаркі не ведае. Пры гэтым суразмоўніца ўпэўненая, што неабходнасці ў каранціне для навучэнцаў няма.
— Шчыра кажучы, я думаю, што, паколькі мы ўсе былі кантактамі, цяпер ужо ізаляцыю і каранцін рабіць бессэнсоўна, бо мы ж усе адно з адным размаўлялі. Высветляць, што паслужыла прычынай, але мы ўжо ўсе перасябравалі адно з адным, дык што ўжо цяпер? Усё нармальна. <…> Я вас запэўніваю, што ўсё пад кантролем. Думаю, што пасля выходных ужо ўсё будзе вядома. Усё працуе, таму не трэба перажываць, — супакоіла яна.
Міністэрства адукацыі: «На гэты момант у маладых пацыентаў пацвердзілі наравірус»
Пасля абеду Міністэрства адукацыі ў сваім тэлеграм-канале таксама апублікавала падрабязнасці таго, што адбылося.
— Дзякуем нашым медыкам за аператыўнае аказанне дапамогі вучням ліцэя БНТУ. На гэты момант у маладых пацыентаў пацвердзілі наравірус. Гэтая кішачная інфекцыя можа быць выкліканая невыкананнем правілаў асабістай гігіены навучэнцамі, — гаворыцца ў паведамленні міністэрства. — Жадаем хутчэйшага выздараўлення і настойліва раім не грэбаваць элементарнымі правіламі асабістай гігіены, а менавіта старанна мыць рукі перад прыёмам ежы, пасля наведвання прыбіральні і вуліцы.
Старшыня камітэта па ахове здароўя Мінгарвыканкама Ігар Юркевіч расказаў «Мінск-Навінам», што стан дзяцей, якія знаходзяцца на лячэнні ў бальніцы, стабільны, хутка іх выпішуць дадому:
— Заражэнне навучэнцаў не звязанае з якасцю прыгатавання ежы ў сталоўцы або з невыкананнем санэпідрэжыму. Цяпер стан дзяцей стабільны, пагрозы іх жыццю няма. У найбліжэйшыя дні яны будуць выпісаныя дадому.
Наравірус — адзін з разнавіднасцяў кішачных вірусаў, які выклікае вострую кішачную інфекцыю. Наравірус вельмі заразны: усяго 10−100 часцінак віруса дастаткова для заражэння. Інфікаваны чалавек можа заразіць навакольных на піку захворвання і цягам наступных 48 гадзін. Чалавек, як правіла, заразны некалькі тыдняў (звычайна 7−14 дзён) пасля выздараўлення, што і абумоўлівае заражэнне навакольных і эпідэмічную небяспеку.
Як правіла, вірус выдзяляецца ад хворага чалавека з натуральнымі адпраўленнямі і іншымі выдзяленнямі, напрыклад, з ванітамі. Асноўныя шляхі перадачы наравіруса — гэта:
- Кантактна-бытавы (траплянне віруса ў арганізм праз нямытыя рукі, прадметы ўжытку, посуд і г. д.).
- Харчовы (чалавек заражаецца, з’еўшы нямытую садавіну, гародніну ці прадукты харчавання, інфікаваныя хворым падчас гатавання ім ежы).
- Водны (чалавек заражаецца, выпіўшы пэўную колькасць вадкасці, якая змяшчае вірус).
- Паветрана-кропельны (у выніку ўдыхання чалавекам паветра, які змяшчае вірусныя часцінкі).
Паводле звестак медыкаў, часцей за ўсё перадача віруса адбываецца ад хворага чалавека да здаровага праз прадметы ўжытку. У адрозненне ад бактэрый, кішачныя вірусы ў харчовых прадуктах, вадзе, на паверхні прадметаў не размнажаюцца, але доўга выжываюць. Гэта ўласціва і наравірусам: вільготная ўборка са звычайнымі мыйнымі і спіртазмяшчальнымі сродкамі не забяспечвае яго знішчэнне, вірус устойлівы да высыхання, замарожвання, награвання да 60 градусаў. Гіне ён толькі ад дэзінфікавальных сродкаў з утрыманнем хлёркі.
Чытайце таксама
