У Беларусі ўвечары 1 ліпеня зноў штарміла, асабліва на поўначы краіны. Мінэнерга расказала пра шкоду, якую нанесла ўчорашняя непагадзь, і паказала яе наглядна: на здымках — выкарчаваныя дрэвы, абарваныя электрадраты і паваленыя апоры.
За мінулыя суткі пасля ўрагану электрычнасць знікала ў 788 населеных пунктах краіны, у асноўным у Мінскай і Віцебскай абласцях. Больш за ўсё ад непагадзі пацярпелі Полацкі, Барысаўскі, Слуцкі, Ушацкі раёны.
Навальніцы з моцным дажджом і шквалістым ветрам, парывы якога дасягалі 20 м/с, сталі прычынай падзення дрэваў і галін на лініі электраперадачы. Месцамі драты былі абарваныя, а апоры — пашкоджаныя.
У ліквідацыі наступстваў непагадзі ўдзельнічалі 148 аварыйных брыгадаў, у іх складзе — 387 чалавек і 134 адзінкі тэхнікі.
Паводле звестак на 7.00 2 ліпеня, аднаўленчыя работы працягваліся ў 128 населеных пунктах.
У МНС дадалі, што ад праходжання навальнічнага фронту з ветрам пацярпелі сем населеных пунктаў у пяці раёнах Беларусі — па два ў Віцебскай і Мінскай абласцях і адзін у Гомельскай.
Пашкоджаныя дахі 20 жылых дамоў у Віцебскай і трох — у Мінскай абласцях, двух вытворчых будынкаў у гэтых жа абласцях, сельскагаспадарчага будынка ў Віцебскай вобласці і гаспадарчыя пабудовы ў Гомельскай вобласці.
Зафіксаваныя 73 выпадкі падзення дрэваў па ўсёй Беларусі, у тым ліку 53 у Віцебскай вобласці і тры ў Мінску. Паваленым дрэвам пашкоджаны аўтамабіль у Капыльскім раёне.
Нагадаем, складаныя ўмовы надвор’я захаваюцца і сёння, 2 ліпеня: праз моцныя дажджы абвешчаны аранжавы ўзровень небяспекі.
