На волю пачалі выходзіць памілаваныя палітвязні — вядома як мінімум пра сем чалавек. Сярод вызваленых ёсць сур’ёзна хворыя, паведамілі ў ініцыятыве Dissident.by.
«Стала вядома, што на волю пачалі выходзіць людзі па памілаванні. На сённяшні момант вядомыя імёны трох чалавек, сярод іх ёсць людзі з сур’ёзнымі захворваннямі», — паведамілі ў Dissident.by.
Пазней там удакладнілі, што вядомыя імёны ўжо шасці вызваленых палітвязняў.
У праваабарончым цэнтры «Вясна» расказалі, што палітвязні выйшлі на волю па памілаванні ў апошнія суткі.
«Праваабаронцы захоўваюць інфармацыйную цішыню для бяспекі вязняў, таму пакуль не публікуюць прозвішчаў гэтых людзей. Інфармацыя пра іншых вызваленых правяраецца», — адзначылі ў ПЦ «Вясна».
Пазней праваабаронцы дадалі, што ведаюць імёны сямі тых, хто выйшаў па памілаванні.
Нагадаем, Аляксандр Лукашэнка 16 жніўня падпісаў указ пра памілаванне 30 чалавек, асуджаных за «злачынствы пратэснай скіраванасці». Сярод памілаваных 14 жанчын і 16 мужчын, некаторыя з іх маюць сур’ёзныя захворванні. Таксама ёсць пенсіянеры. Канкрэтныя прозвішчы памілаваных не называюцца, сам указ не публікаваўся.
Сярод 30 памілаваных ёсць тыя, каго раней ужо вызвалілі, расказваў дарадца Святланы Ціханоўскай Франак Вячорка. Паводле яго, частка гэтых людзей ужо была вызваленая ў ліпені і жніўні, а ўказ фармалізаваў гэты працэс.
Паводле інфармацыі «Вясны», 3 ліпеня на волю па амністыі ці памілаванні ўжо выйшлі 18 палітвязняў. Сярод іх — чатыры жанчыны і 14 мужчын, уключаючы хворага на анкалогію Рыгора Кастусёва.
Спачатку публічна называлася толькі імя Кастусёва. Пазней стала вядома, што на волю з Гомельскай жаночай калоніі выйшлі палітвязні Дар’я Лосік, Святлана Лупач, Паліна Палавінка, Тамара Астрэйка і Кацярына Мадзянкова.
Таксама нядаўна праваабаронцы паведамлялі, што ўлады працягваюць выпускаць палітвязняў, некаторым прапануюць паўторна прасіць памілавання. Паводле непацверджанай інфармацыі, гаворка ідзе прыкладна пра 12 такіх асобаў.