Артур Мемех пераехаў у ЗША вясной 2020 года. Падобна, што яго затрымалі, калі ён вырашыў наведаць сваякоў у Беларусі. Неўзабаве пачнецца суд, паведамляе "Наша Ніва".
Артуру Мемеху 33 гады. Ён мінчук. У 2013 годзе скончыў Беларускі дзяржаўны ўніверсітэт інфарматыкі і радыёэлектронікі, але ўжо з 3 курса пайшоў працаваць у EPAM.
У EPAM Артур дарос да пасады senior software engineer — гэта нешта кшталту вядучага інжынера ў беларускай сістэме. А ў сакавіку 2020 года, перад самым пачаткам эпідэміі кавіда, ён рэлацыраваўся ў ЗША на тую ж пасаду ў офіс EPAM у горадзе Уіхокен, які знаходзіцца ў штаце Нью-Джэрсі, але вельмі блізка ад Нью-Ёрка.
Артур любіць падарожнічаць і аб’ездзіў шмат гарадоў ЗША.
Апошні раз ён быў анлайн у сацсетках напрыканцы мінулай восені. Падобна, што Мемех вырашыў наведаць Беларусь у канцы 2023 года ці пачатку 2024 года і быў затрыманы.
Артура пачынаюць судзіць 23 верасня 2024 года. Абвінавачваюць у «садзеянні экстрэмісцкай дзейнасці» (ч. 1 і ч. 2 арт. 361−4 КК). Судзіць яго будзе Аляксандр Рудэнка.