57-гадовага начальніка кацельні Віцебскага маслаэкстракцыйнага завода Уладзіміра Сітковіча будуць судзіць па палітычнай крыміналцы за данаты. Яму пагражае да пяці гадоў калоніі, паведамляе «Наша Ніва».
Уладзіміру Сітковічу 57 гадоў. Родам ён з малой вёскі Пушча Шаркаўшчынскага раёна Віцебскай вобласці. У 1991 годзе скончыў Полацкі дзяржаўны ўніверсітэт. Доўгі час Уладзімір працаваў і жыў у Віцебску, а апошнія гады кіраваў кацельняй на Віцебскім маслаэкстракцыйным заводзе.
Уладзімір — байкер, удзельнічаў у мясцовых байкерскіх заездах.
У 2016, 2018 і 2019 гадах ён быў назіральнікам на мясцовых ды парламенцкіх выбарах. Пра іншую палітычную актыўнасць Уладзіміра невядома, сацсеткі мужчыны таксама нейтральныя.
Упершыню пра яго пісалі ў маі 2024 года. Тады яму далі адны суткі за падпіску на «Краіну для жыцця» ў тыктоку. Але, падобна, што на гэтым яго пераслед не скончыўся.
Уладзіміра пачнуць судзіць па крымінальнай справе 14 кастрычніка 2024 года. Яго абвінавачваюць у «фінансаванні экстрэмісцкай дзейнасці» (ч. 1 арт. 361−2 КК). Мужчыне пагражае да пяці гадоў калоніі. Сутнасць абвінавачанняў невядомая.
Судзіць Уладзіміра будзе Яўген Буруноў. Першы раз Буруноў удзельнічаў у палітычным крымінальным працэсе яшчэ ў 2011 годзе, тады судзілі Сяргея Каваленку за тое, што ён вывесіў бел-чырвона-белы сцяг у Віцебску. З 2020-га Буруноў вынес больш за 20 палітычна матываваных крымінальных прысудаў.