З сярэдзіны верасня да пачатку лістапада ЗША чакае істотнай эскалацыі абстаноўкі на фронце з боку як Масквы, так і Кіева. Пра гэта са спасылкай на «звесткі беларускіх спецслужбаў» расказаў Аляксандр Лукашэнка ў сваім выступе 17 верасня на канцэрце да Дня адзінства.
Паводле палітыка, гэтая інфармацыя была агучаная ў закрытай частцы перамоваў прадстаўнікоў беларускіх дэмсілаў са службовымі асобамі ЗША. Сустрэча, як заявілі «беларускія спецслужбы», нібыта адбылася «ў адной з краін», называць якую Лукашэнка ў сваім выступе не стаў «з пэўных прычын».
— Агучылі (прадстаўнікі ЗША. — Заўв. рэд.) наступныя тэзісы: з сярэдзіны верасня да пачатку лістапада ЗША чакаюць істотнай эскалацыі ваеннай абстаноўкі з боку як Масквы, так і Кіева на фронце. Я хачу, каб гэта пачулі і расіяне. Мы да іх пакуль не даводзілі гэтай інфармацыі. Заходнія спецслужбы кажуць пра Беларусь як пра магчымае месца эскалацыі, — зачытаў Лукашэнка з паперкі інфармацыю ад «беларускіх спецслужбаў».
Ён адзначыў, што гаворка ідзе не пра ўступленне беларускіх войскаў у вайну ва Украіне, а «пра рэакцыю ў адказ Кіева на пралёты расійскіх беспілотнікаў праз тэрыторыю Беларусі — аж да нападаў на аб’екты памежнай інфраструктуры» нашай краіны.
— То-бок амерыканцы паказалі Кіеву, калі складуцца абставіны, атакаваць нашую інфраструктуру па паўднёвай мяжы. Прычына — расійскія беспілотнікі лётаюць над… побач з тэрыторыяй Беларусі. Мушу вам адкрыта заявіць. Мы дамовіліся па каналах з украінцамі, што мы не будзем у СМІ падсвятляць факты залёту беспілотнікаў і расійскіх, і ўкраінскіх на нашую тэрыторыю.
Як растлумачыў Лукашэнка, чужыя дроны залятаюць у Беларусь, бо «і тыя, і іншыя дрэнна кіруюць беспілотнікамі», а таксама эфектыўна працуе сістэма радыёэлектроннай барацьбы.
— Адзін з іх (беспілотнікаў. — Заўв. рэд.) мы знайшлі аж пад Бабруйскам — у цэнтры Беларусі. І гэта былі ўкраінскія беспілотнікі, а не расійскія. Хоць і з іншага боку бывае, — заявіў Лукашэнка.