Расійскую ракету на кавярню ў вёсцы Граза Харкаўскай вобласці навялі два
мясцовыя жыхары — 30-гадовы Уладзімір Мамон і яго малодшы брат, 23-гадовы Дзмітрый Мамон. Пра гэта паведамляе Служба бяспекі Украіны.
Паводле звестак спецслужбы, браты Мамоны падчас акупацыі рэгіёна перайшлі на бок Расіі і пачалі служыць у паліцыі: адзін з іх быў «кіроўцам канвойнай групы», другі — «інспектарам дарожна-патрульнай службы».
— Напярэдадні вызвалення рэгіёна яны збеглі ў Расію, дзе працягнулі працаваць на карысць краіны-агрэсара.
Як заявілі ў СБУ, браты дыстанцыйна пачалі фармаваць уласную сетку інфарматараў на падкантрольнай Украіне тэрыторыі і пад выглядам сяброўскіх размоваў і перапісак выпытвалі ў людзей цікавую для іх інфармацыю.
Даведаўшыся пра тое, што 5 кастрычніка ў мясцовай кавярні будуць праходзіць памінкі па загінулым украінскім вайскоўцу, Уладзімір Мамон перадаў гэтыя звесткі расійскаму боку, сцвярджаюць у СБУ.
Нагадаем, удзень 5 кастрычніка расійская армія ўдарыла па краме і кавярні ракетай «Іскандэр М». У выніку нападу загінулі 55 чалавек, у тым ліку дзіця. Колькасць ахвяр можа ўзрасці, бо зніклымі без вестак лічацца тры чалавекі.
Пастаянны прадстаўнік Расіі пры ААН Васіль Небянзя, выступаючы на паседжанні Савета Бяспекі ААН па Украіне, заявіў, што ў вёсцы ў момант атакі праходзіла «пахаванне аднаго з высокапастаўленых украінскіх нацыяналістаў», у якім удзельнічала «мноства яго змоўшчыкаў-неанацыстаў».
Чытайце таксама
