Падчас размовы з жыхарамі аграгарадка Парахонск Пінскага раёна Аляксандр Лукашэнка заявіў, што Беларусь збівае шмат беспілотнікаў, якія заляцелі ў нашую краіну, піша яго прэс-служба.
Паводле яго, і Украіна, і Расія цяпер закупляюць велізарную колькасць БПЛА, але «ў нявопытных руках і пасля ўздзеяння сродкаў радыёэлектроннай барацьбы яны страчваюць арыенцір і залятаюць у Беларусь».
«Некалькі выпадкаў такіх было і з боку Расіі, і з боку Украіны, — сказаў Аляксандр Лукашэнка. — Шмат мы збіваем. Мы не глядзім, гэта расійскія ці ўкраінскія».
Палітык адзначыў, што ў Беларусі пачалі вырашаць гэтыя пытанні на ўзроўні спецыялістаў, не выносячы ў публічнае поле. Нібыта такія дамоўленасці былі дасягнутыя і з абодвума бакамі.
«Вось учора… Я нават здзівіўся, калі атрымаў інфармацыю. Гэта нашыя збеглыя з-за мяжы пачалі падкідваць: насустрач прэзідэнцкаму борту вылецелі беспілотнікі. Думаю, што гэта дробнае паскудства, правакацыя. Трэба разумець, што мы знаходзімся на фронце: зусім побач, вось за плотам ідзе вайна. Таму мая галоўная задача — не дапусціць уцягвання ў гэтую бойку, у гэтую вайну Беларусі, — заявіў Лукашэнка. — Таму мы на гэта рэагуем як спецыялісты, рэагуем моўчкі, але даём зразумець, што ў выпадку, калі не дай бог што, давядзецца адказваць. Адказаць ёсць чым».
Ён таксама дадаў, што «збіць верталёт прэзідэнта — гэта вайна, якая ўкраінцам не патрэбная».
«Таму я не думаю, што ва Украіне тыя, хто прымае рашэнні, заклапочаныя гэтай праблемай. Хоць, вядома, што тут казаць, гэта непрыемна», — падсумаваў палітык.
Нагадаем, маніторынгавы праект «Беларускі Гаюн» паведамляў, што ў Калінкавічах раніцай 3 кастрычніка выбухнуў расійскі «Шахед»: каля пяці раніцы жыхары горада чулі гучны гук выбуху. Пасля гэтую інфармацыю ўдалося пацвердзіць з некалькіх крыніц. У выніку высветлілася, што выбух над Калінкавічамі быў чуваць каля 04.55.
Увечары ў чатах Калінкавічаў пачало распаўсюджвацца відэа, знятае камерай вонкавага назірання, з імаверным падзеннем беспілотніка. На запісе чуваць шум бензінавага рухавіка і аглушальная дэтанацыя боепрыпасу.
Днём 4 кастрычніка стала вядома, што гаспадыню дома ў Калінкавічах, побач з якім было знятае відэа з гукам падзення беспілотніка, затрымалі супрацоўнікі КДБ з сілавой падтрымкай вайскоўцаў САХР.