Генеральны пракурор Беларусі Андрэй Швед расказаў, што прыняць да вытворчасці крымінальную справу пра забойства чатырох дзяцей у Оршы было яго рашэннем, перадае Sputnik.
«На мінулым тыдні адбылася трагедыя ў Оршы, маці забіла чатырох уласных няпоўнагадовых дзяцей ва ўзросце ад аднаго года да дзевяці гадоў, цяпер Генеральнай пракуратурай вядзецца расследаванне гэтага абуральнага факта», — сказаў Андрэй Швед.
Паводле яго, пракурорам трэба будзе разабрацца ва ўсіх абставінах таго, што адбылося, але ён не мае права выдаваць падрабязнасці справы, пакуль ідзе следства.
«Яшчэ месяц таму было прынятае рашэнне, каб гэтую сям’ю ў СНП перавесці. Месяц ляжала рашэнне без выканання. Вядома, у гэтым трэба разбірацца. Чаму толькі месяц таму, а не год, не два», — так адказаў Швед на пытанні дэпутатаў пра гэтую гучную справу.
«Прынялі рашэнне, а чаму не рэалізавалі, чаму гэтая маці не магла накарміць гэтых дзяцей?» — падкрэсліў генпракурор.
І пэўныя службовыя асобы пра гэта ведалі, дадаў Андрэй Швед.
Нагадаем, 14 лютага ў Оршы знайшлі целы дзяцей ад 1 да 8 гадоў з прыкметамі задушэння. Іх 36-гадовая маці была затрыманая па падазрэнні ў забойстве. Распачатая крымінальная справа па чч. 1 і 2 арт. 139 КК (Забойства дзвюх і больш асоб, здзейсненае ў дачыненні да малагадовых).
У Генпракуратуры паведамілі, што ў няпоўнай сям'і выхоўваліся шэсць дзяцей. У іх былі розныя бацькі. Раней у дачыненні да сям'і тройчы праводзіліся сацыяльныя расследаванні. Апошняя праверка прайшла ў студзені. Па яе выніках вынеслі заключэнне, што ўсе дзеці знаходзяцца ў сацыяльна небяспечным становішчы. У ведамстве паведамілі, што бацькі «не задавальнялі асноўных жыццёвых патрэбаў дзяцей, не выконвалі рэкамендацый медыцынскіх работнікаў». Акрамя таго, у доме сістэматычна адсутнічала ежа, а бацькі дзяцей «вялі амаральны лад жыцця» і жылі асобна. Аднаго з іх раней адправілі ў лекава-працоўны прафілакторый. Прадстаўнік Генпракуратуры таксама адзначыў, што на целах забітых дзяцей былі знойдзеныя сляды задушэння.
Пазней СМІ паведамілі, што маці дзяцей памерла ў бальніцы — пасля забойства яна спрабавала скончыць жыццё самагубствам, яе знайшлі побач з целамі дзяцей у крыві. Афіцыйна гэтая інфармацыя не пацверджаная.