Супрацоўнікі КДБ з сілавой падтрымкай вайскоўцаў САХР затрымалі жыхарку Калінкавічаў, паведамілі ў прэс-службе ўнутраных войскаў МУС. Мяркуючы з усяго, гаворка ідзе пра дом, дзе камерай вонкавага назірання было знятае відэа з імаверным падзеннем беспілотніка 3 кастрычніка.
Жанчына затрыманая «за супрацоўніцтва з экстрэмісцкімі рэсурсамі», паведамілі ва ўнутраных войсках. На апублікаваным відэа бачна, што ўзброеныя сілавікі прыехалі да яе дома, дзе спачатку не змаглі адкрыць брамку, таму адзін з іх пералазіў праз яе.
Потым чалавеку, які выйшаў да іх, загадалі легчы ў двары, а пасля праніклі ў дом. Двор — той самы, што і на апублікаваным «Флагштокам» відэа з Калінкавічаў з гукам падзення ўдарнага дрона.
«Перадаючы інфармацыю, фота- і відэаматэрыялы адміністратарам дэструктыўных тэлеграм-каналаў, жанчына не толькі магла пасеяць паніку сярод насельніцтва і дэзінфармаваць яго, але і зарабіла сабе крымінальную адказнасць», — гаворыцца ў паведамленні ўнутраных войскаў.
Ніякіх доказаў таго, што жанчына перадавала відэа менавіта «экстрэмісцкім рэсурсам», не прыводзіцца.
Нагадаем, маніторынгавы праект «Беларускі Гаюн» паведамляў, што ў Калінкавічах раніцай 3 кастрычніка выбухнуў дрон «Шахед»: каля пяці раніцы жыхары горада чулі гучны гук выбуху. Пасля гэтую інфармацыю ўдалося пацвердзіць з некалькіх крыніц. У выніку высветлілася, што выбух над Калінкавічамі быў чутны каля 04.55.
Увечары ў чатах Калінкавічаў пачало распаўсюджвацца відэа, знятае камерай вонкавага назірання, з імаверным падзеннем беспілотніка. На запісе чуваць шум бензінавага рухавіка і аглушальная дэтанацыя боепрыпасу.
Крыніцы «Флагштока» паведамляюць, што дрон выбухнуў на вуліцы Куйбышава — менавіта яе раніцай 3 кастрычніка перакрывала міліцыя.
Раніцай таго ж дня маніторынгавыя каналы паведамлялі пра заход «Шахеда» з Украіны ў паветраную прастору Беларусі і яго рух у напрамку Мазыра, на ўсход ад Нароўлі.